اے دیوانے

تجھے وطن  سے بھگایا جائے گا تب اٹھے گا
ترا   نشیمن   جلایا   جائے  گا  تب  اٹھے گا
بتا  اے دیوانہ!!!!!!!!!!!!   کب  اٹھے  گا؟؟؟؟

ابھی  شرافت  کادور  ہے  تو  پڑا  ہے سویا
ترا   تماشہ   بنایا   جائے   گا  تب   اٹھے گا
بتا   اے     دیوانہ!!!!!!   کب    اٹھے   گا؟؟؟

تو سنگ بازوں کے ہاتھوں کو کیوں نہ توڑ دیتا
ترا مکاں جب گرایا جائے گا تب اٹھے گا
بتا   اے     دیوانہ!!!!!!   کب    اٹھے   گا؟؟؟

ابھی چَھڑِی کےہی خوف سےہےتوگھرمیں بیٹھا
چُھرا  گلے  پر   چلایا  جائے  گا  تب اٹھے گا
بتا   اے دیوانہ!!!!!!!!!!!!!  کب      اٹھے گا؟؟ 

پکڑ   پکڑ   کر   ترا  عزیز اور پیارا  بچہ
کڑھائی  پر جب چڑھایا جائے گا تب اٹھے گا
بتا  اے دیوانہ!!!!!!!!!!  کب   اٹھے   گا؟؟؟؟

جوان اولاد ،  بھائی  ،بہن،  اور باپ، ماں کو
جگہ جگہ پر  ستایا  جائے  گا تب اٹھے گا
بتا  اے دیوانہ!!!!!!  کب   اٹھے  گا؟؟؟؟؟

جب آبرو عورتوں کی باقی نہ بچ سکے گی
جب ان کو زندہ جلایا جائے گا تب اٹھے گا
بتا اے دیوانہ!!!!!!!!!  کب اٹھے گا ؟؟؟؟؟؟؟

لہو لہو ہے  جو سارا  منظر تو کیوں ہے سویا
لہو  ترا    جب   بہایا    جائے  گا  تب اٹھے گا
بتا  اے دیوانہ!!!!!!!!!!!!! تو  کب   اٹھے گا؟؟؟؟؟

اے فانی کب تک یوں غفلتوں میں پڑا رہے گا
ترا نشاں جب مٹایا جائے گا تب اٹھے گا
بتا  اے دیوانہ!!!!!!  کب   اٹھے  گا؟؟؟؟؟

عظیم شاعر مرزا اسد اللہ غالب

15 فروری 1869 اردو کے عظیم شاعر مرزا اسد اللہ غالب کی تاریخ وفات ہے

ذکر اس پری وش کا اور پھر بیاں اپنا
بن گیا رقیب آخر تھا جو رازداں اپنا
مے وہ کیوں بہت پیتے بزم غیر میں یا رب
آج ہی ہوا منظور ان کو امتحاں اپنا
منظر اک بلندی پر اور ہم بنا سکتے
عرش سے ادھر ہوتا کاش کے مکاں اپنا
دے وہ جس قدر ذلت ہم ہنسی میں ٹالیں گے
بارے آشنا نکلا ان کا پاسباں اپنا
درد دل لکھوں کب تک جاؤں ان کو دکھلا دوں
انگلیاں فگار اپنی خامہ خونچکاں اپنا
گھستے گھستے مٹ جاتا آپ نے عبث بدلا
ننگ سجدہ سے میرے سنگ آستاں اپنا
تا کرے نہ غمازی کر لیا ہے دشمن کو
دوست کی شکایت میں ہم نے ہم زباں اپنا
ہم کہاں کے دانا تھے کس ہنر میں یکتا تھے
بے سبب ہوا غالبؔ دشمن آسماں اپنا

ابراہیم ذوق

دبستان دہلی میں ابراہیم ذوق کو بڑی اہمیت حاصل ہے۔ محمد ابراہیم نام اور ذوق تخلص تھا۔ ایک غریب سپاہی محمد رمضان کے بیٹے تھے۔آپ سن 1789ء میں دلی میں پیدا ہوئے۔ پہلے حافظ غلام رسول کے مکتب میں تعلیم پائی۔ حافظ صاحب کو شعر و شاعری کا شوق تھا۔ جس کے سبب ذوق بھی شعر کہنے لگے۔ اس زمانے میں شاہ نصیر دہلوی کی طوطی بول رہی تھی ۔ ذوق بھی ان کے شاگرد ہو گئے۔ دل لگا کر محنت کی اور ان کی شاعرانہ مقبولیت بڑھنے لگی۔ بہت جلد علمی و ادبی حلقوں میں ان کا وقار اتنا بلند ہو گیا کہ قلعہ معلیٰ تک رسائی ہوگئی۔ اور خود ولی عہد سلطنت بہادر شاہ ظفر ان کو اپنا کلام دکھانے لگے۔ شاہ اکبر ثانی نے ایک قصیدہ کے صلہ میں ملک الشعراء خاقانی ہند کا خطاب مرحمت فرمایا۔ شروع میں چار روپے ماہانہ پر بہادر شاہ ظفر کے استاد مقرر ہوئے۔ آخر میں یہ تنخواہ سو روپیہ تک پہنچ گئی۔ مسلسل عروس سخن کے گیسو سنوارنے کے بعد 16 نومبر 1854ء میں دنیائے ادب کا یہ مہردرخشاں ہمیشہ کے لیے غروب ہو گیا۔ مرنے سے چند ساعت پہلے یہ شعر کہا تھا۔

*شیخ ابراہیم ذوق کی آخری آرام گاہ، پہاڑ گنج، شمالی دہلی*

*کہتے آج ذوق جہاں سے گزر گیا*
*کیا خوب آدمی تھا خدا مغفرت کرے*

ابراہیم ذوق کو عربی فارسی کے علاوہ متعدد علوم موسیقی، نجوم ، طب، تعبیر خواب وغیرہ پر کافی دسترس حاصل تھی۔ طبیعت میں جدت و ندرت تھی۔ تمام عمر شعر گوئی میں ہی بسر کی۔

۔۔: بھیونڈی میں ماسٹر الہی بخش ایوارڈ تقسیم انعامات براے سال ۲۰۱۸ ؁ء تقریب کا انعقاد :۔۔

بھیونڈی :۔ بھیونڈی کے صنوبرہال میں ہر سال کی طرح امسال بھی معصوم ایجوکیشن اینڈ ویلفیر سوسائٹی بھیونڈی کے تحت ایک پروقار تقریب ماسٹر الہی بخش ایوارڈ تقسیم انعامات براے سال ۲۰۱۸ ؁ء کا انعقاد کیا گیا جس کی صدارت عمدہ الادب مولانا ابوظفر حسان ندوی ازہری نے انجام دی، پروگرام کی نظامت نوجوان شاعر شکیل احمد شکیل نے انجام دی۔ پروگرا م میں مہمانان خصوصی کی طور پر بزرگ شاعر شاکر ادیبی،ڈاکٹر جمیل علیگ، سیماب انور اور حافظ ارشاد شریک تھے۔
امسال ماسٹر الہی بخش ایوارڈ براے ۲۰۱۸ ؁ء بھیونڈی کے استاد الشعراء حضرت مومن جان عالم رہبر کی خدمت میں صدر جلسہ اور سو سائٹی کے صدر خلیق الزماں نصرت کے ہاتھوں مومنٹو، شال ،کتابوں کا نذرانہ ،سند اور نقد رقم کی طور پر پیش کیا گیا۔
امسال کے دیگر ترغیبی ایوارڈ مشہور شاعر عبید اعظم اعظمی،معروف نوجوان شاعر اور کمشنر آف ممبی پولیس قیصر خالد،پرنسپل رئیس ہائی اسکول ضیا الرحمن انصاری،خوش گلو شاعر ساز الہ آبادی اورابھرتے ہوے منفرد لب ولہجہ کے شاعر شبیر احمد شاد کوپیش کیے گئے۔ ایم مبین، سیماب انور ،عقیل احمد عاقل اور امیر حمزحلبے نے انعام یافتگان کا تعارف خاکوں کی طور پر پیش کیا۔ انعام یافگان نے اپنے تاثرات اور اپنا کلام پیش کیا۔
خلیق الزماں نصرت نے سوسائٹی کی جانب سے مہمانان اورانعام یافتگان اور شعری نشست میں شریک شعراء کو کتابوں کے نذرانے پیش کر کے ان کا استعقبال کیا گیا۔
سوسائٹی کے سکریٹری ایم مبین نے سوسائٹی کی پانچ سالہ روداد پیش کی۔
اس پروگرام میں ایم مبین کی دو کتابوں کا اجراء ’’ گونگا سچ‘‘ ڈراموں کا مجموعہ کا اجراء صدر جلسہ اور ہندی افسانوی مجموعہ ’’ بوڑھا بیمار ہے ‘‘ کی رسم اجراء بدست قیصر خالد کی تقریب بھی منعقد کی گئی۔
پروگرام کے افتتاح میں ڈاکٹر جمیل علیگ نے ماسٹر الہی بخش پر ایک مقالہ پیش کیا۔ماسٹر الہی بخش کے خانوادے کی چھٹی نسل کے دو معصوم بچوں ،ریحان اورخلیق الزماں نصرت کی پوتی نبیحہ ارشد نے تلاوت قرآن پیش کی۔
پروگرام کے بعد ایک مختصر شعری نشست کا انعقاد کیا گیا جس میں عبید اعظم اعظمی،قیصر خالد،شکیل احمد شکیل،حافظ ارشاد،صادق جونپوری، عقیل احمد عاقل شہزاد حسین شہزاد اور امیر حمزہ حلبے نے اپنا کلام پیش کیا۔
ایم مبین اور سوسائٹی کے صدر خلیق الزماں نصرت کے شکریہ کے ساتھ پروگرام کا خاتمہ ہوا۔

سالگرہ مبارک

*17 جنوری....مشہور و معروف شاعر..نغمہ نگار...مکالمہ نویس...کہانی کار...منظر نامہ نگار جاوید اختر صاحب کا یوم ولادت*

اردو شاعری میں بلند مقام رکھنے والے شاعر جان نثار اختر کے فرزند جاوید اختر صاحب کا آج یوم پیدائش ہے...17 جنوری 1945 کو خیرآباد(سیتا پور) میں پیدا ہونے والے جاوید اختر ایک بہترین شاعر ہونے کے ساتھ ساتھ بالی ووڈ میں بھی اپنی بے شمار اور گونا گوں خدمات کے حوالوں سے پہچانے جاتے ہیں....انہیں کئی فلم فئیر ایوارڈ  کے علاوہ پدم بھوشن اور پدم شری جیسے اعزاز بھی تفویض کئے جا چکے ہیں...موصوف نے انتہائی معیاری نغمہ نگاری کی ہے...فلمی شاعری کے علاوہ بھی جاوید صاحب نے بہت ہی معیاری نظمیں اور غزلیں کہی ہیں...آج موصوف کے یوم ولادت کے موقع پر ان کے کچھ منتخب اشعار احباب کی خدمت میں پیش ہیں...

*آگہی سے ملی ہے تنہائی*
آ مری جان مجھ کو دھوکا دے

اگر پلک پہ ہے موتی تو یہ نہیں کافی
ہنر بھی چاہئے الفاظ میں پرونے کا

*دکھ کے جنگل میں پھرتے ہیں کب سے مارے مارے لوگ*
*جو ہوتا ہے سہہ لیتے ہیں کیسے ہیں بے چارے لوگ*

ایک یہ دن جب اپنوں نے بھی ہم سے ناطہ توڑ لیا
ایک وہ دن جب پیڑ کی شاخیں بوجھ ہمارا سہتی تھیں

*غلط باتوں کو خاموشی سے سننا حامی بھر لینا*
*بہت ہیں فائدے اس میں مگر اچھا نہیں لگتا*

ہے پاش پاش مگر پھر بھی مسکراتا ہے
وہ چہرہ جیسے ہو ٹوٹے ہوئے کھلونے کا

*ان چراغوں میں تیل ہی کم تھا*
*کیوں گلہ پھر ہمیں ہوا سے رہے*

*اس شہر میں جینے کے انداز نرالے ہیں*
*ہونٹوں پہ لطیفے ہیں آواز میں چھالے ہیں*

جدھر جاتے ہیں سب جانا ادھر اچھا نہیں لگتا
مجھے پامال رستوں کا سفر اچھا نہیں لگتا

*خون سے سینچی ہے میں نے جو زمیں مر مر کے*
*وہ زمیں ایک ستم گر نے کہا اس کی ہے*

کوئی شکوہ نہ غم نہ کوئی یاد
بیٹھے بیٹھے بس آنکھ بھر آئی

*میں بچپن میں کھلونے توڑتا تھا*
*مرے انجام کی وہ ابتدا تھی*

*مجھے دشمن سے بھی خودداری کی امید رہتی ہے*
*کسی کا بھی ہو سر قدموں میں سر اچھا نہیں لگتا*

پھر خموشی نے ساز چھیڑا ہے
پھر خیالات نے لی انگڑائی

*سب کا خوشی سے فاصلہ ایک قدم ہے*
*ہر گھر میں بس ایک ہی کمرہ کم ہے*

تھیں سجی حسرتیں دکانوں پر
زندگی کے عجیب میلے تھے

*اس کی آنکھوں میں بھی کاجل پھیل رہا ہے*
*میں بھی مڑ کے جاتے جاتے دیکھ رہا ہوں*

اونچی عمارتوں سے مکاں میرا گھر گیا
کچھ لوگ میرے حصے کا سورج بھی کھا گئے

*یاد اسے بھی ایک ادھورا افسانہ تو ہوگا*
*کل رستے میں اس نے ہم کو پہچانا تو ہوگا*

یہ زندگی بھی عجب کاروبار ہے کہ مجھے
خوشی ہے پانے کی کوئی نہ رنج کھونے کا

*غیروں کو کب فرصت ہے دکھ دینے کی*
*جب ہوتا ہے کوئی ہمدم ہوتا ہے*

ہر طرف شور اسی نام کا ہے دنیا میں
کوئی اس کو جو پکارے تو پکارے کیسے

ہمیں یہ بات ویسے یاد تو اب کیا ہے لیکن ہاں اسے یکسر بھلانے میں ابھی کچھ دن لگیں گے

میں قتل تو ہو گیا تمہاری گلی میں لیکن
مرے لہو سے تمہاری دیوار گل رہی ہے

*مجھے مایوس بھی کرتی نہیں ہے*
*یہی عادت تری اچھی نہیں ہے*

یہی حالات ابتدا سے رہے
لوگ ہم سے خفا خفا سے رہے

مرزا اسد اللہ خان غالب

آج ۲۷ دسمبر دنیائے سخن وری کے مہتاب اور لازوال شاعر "مرزا اسد اللہ خان غالب" کا یومِ ولادت ہے—

آپ کی عظمت کا راز صرف آپ کی شاعری کے حُسن اور بیان کی خوبی ہی میں نہیں ہے— آپ کا ا صل کمال یہ ہے کہ آپ زندگی کے حقائق اور انسانی نفسیات کو گہرائی میں جا کر سمجھتے تھے اور بڑی سادگی سے عام لوگوں کے لیے بیان کر دیتے— غالب جس پُر آشوب دور میں پیدا ہوئے اس میں انہوں نے مسلمانوں کی ایک عظیم سلطنت کو برباد ہوتے ہوئے اور باہر سے آئی ہوئی انگریز قوم کو ملک کے اقتدار پر چھاتے ہوئے دیکھا— غالباً ً یہی وہ پس منظر ہے جس نے ان کی نظر میں گہرائی اور فکر میں وُسعت پیدا کی—

مرزا غالب کا نام اسد اللّٰہ بیگ خاں تھا— والد کا نام عبداللّٰہ بیگ تھا— آپ ۲۷ دسمبر ۱۷۹۷ء میں آگرہ میں پیدا ہوئے— غالب بچپن ہی میں یتیم ہو گئے تھے ان کی پرورش ان کے چچا مرزا نصر اللّٰہ بیگ نے کی لیکن ۸ سال کی عمر میں ان کے چچا بھی فوت ہو گئے— نواب احمد بخش خاں نے مرزا کے خاندان کا انگریزوں سے وظیفہ مقرر کرا دیا— ۱۸۱۰ء میں تیرہ سال کی عمر میں ان کی شادی نواب احمد بخش کے چھوٹے بھائی مرزا الہی بخش خاں معروف کی بیٹی امراء بیگم سے ہو گئی شادی کے بعد انہوں نے اپنے آبائی وطن کو خیر باد کہہ کر دہلی میں مستقل سکونت اختیار کر لی—

شادی کے بعد مرزا کے اخراجات بڑھ گئے اور مقروض ہو گئے— اس دوران میں انہیں مالی مشکلات کا سامنا کرنا پڑا ور قرض کا بوجھ مزید بڑھنے لگا— آخر مالی پریشانیوں سے مجبور ہو کر غالب نے قلعہ کی ملازمت اختیار کر لی اور ۱۸۵۰ء میں بہادر شاہ ظفر نے مرزا غالب کو نجم الدّولہ دبیر الملک نظام جنگ کا خطاب عطا فرمایا اور خاندانِ تیموری کی تاریخ لکھنے پر مامور کر دیا اور ۵۰ روپے ماہوار مرزا کا وظیفہ مقرّر ہوا—

غدر کے بعد مرزا کی سرکاری پنشن بھی بند ہو گئی— چنانچہ انقلاب ۱۸۵۷ء کے بعد مرزا نے نواب یوسف علی خاں والئ رامپور کو امداد کے لیے لکھا— انہوں نے سو روپے ماہوار وظیفہ مقرر کر دیا جو مرزا کو تا دمِ حیات ملتا رہا— کثرتِ شراب نوشی کی بدولت انکی صحت بالکل تباہ ہو گئی مرنے سے پہلے بے ہوشی طاری رہی اور اسی حالت میں ۱۵ فروری ۱۸۶۹ء کو انتقال فرمایا اور دہلی میں آسودۂ خاک ہوئے—

___

ہم کو معلوم ہے جنت کی حقیقت لیکن
دل کے بہلانے کو غالب یہ خیال اچھا ہے

یا

دل کے خوش رکھنے کو غالب یہ خیال اچھا ہے

.
اس شعر کی شرح مولوی نظم حیدر طباطبائی صاحب نے یوں فرمائی...

"مطلب یہ کہ بہشت کیا ہے، نافہموں کو ایک باغِ سبز دکھایا ہے—"

مولانا حسرت موہانی نے اس شعر کی کچھ ایسی ہی شرح کرتے وقت "معاذاللّٰہ" کا بھی اضافہ کر دیا—

اور یہ سب پڑھنے کے بعد میرے اندر کا باغی کھڑا ہو جاتا ہے اور غالب کے فرمان پر سر دھنتا ہے کہ اس رجلِ عظیم نے بھی کیا خوب کہا....

لازم نہیں کہ خضر کی ہم پیروی کریں
جانا کہ اک بزرگ ہمیں ہم سفر ملے

علم بدیع کے علماء گواہ ہیں کہ صنعتِ ابہام وغیرہ شعری صنعتیں ہیں— اس سے شعر میں پہلو داری پیدا ہوجاتی ہے— شعر سننے پر اس کا ایک سادہ سا مطلب سمجھ آجاتا ہے— لیکن غور کرنے پر معلوم ہوتا ہے کہ اندر کچھ اور معانی بھی چھپے ہوئے ہیں—
حیرت ہے کہ بزرگوں نے شرح کرتے وقت غالب کے علم و فضل اور ان کی شاعری میں کجروی اور ان کی عظیم ظرافت جو ان کو دنیا کا واحد حیوانِ ظریف بناتی ہے—

(ڈاکٹر لیول کے نقّاد اس بات پر متَّفق ہیں کہ دنیا میں ڈھائی حیوانِ ظریف ہوئے ہیں— مکمل حیوانِ ظریف مرزا غالب اور شیکسپیئر اور آدھا حیوانِ ظریف گوئٹے—)

اس پسِ منظر میں کوئی چارہ نہیں کہ شعر کی شرح کرنے اور اپنی کم فہمی کے باعث غالب پر لعن طعن کرنے سے پہلے کم از کم غالبیات پر اپنا علم پورا کریں یا پھر کسی ایسے سے مدد لیں جو اس وادئ پرخار کا باشندہ ہو—

شعر کا ظاہری مطلب سامنے ہے کہ جنت کا مذاق اڑایا گیا ہے اور بقول چند شارحین جنت کو سبز باغ کہا گیا ہے—

اگر غالب وجودِ جنّت کے منکر ہوتے تو یہ کیوں فرماتے...؟

خلد بہ غالب سپار زانکہ بدان روضہ در
نیک بود عندلیبِ خاصہ نو آئین نوا

اے خدا تو باغِ جنت مجھے سپرد کر دے کیونکہ اس باغ میں نئے نئے نغمے الاپنے والی بلبل (غالب) ہی موزوں رہے گی—

اور جن کو یہ بات سمجھ آگئی ہے وہ ذرا مزید غور فرمائیں....

اس دنیا میں کس جیتے جاگتے انسان نے جنّت دیکھی ہے...؟؟
کسی نے نہیں دیکھی....
ہم تک قرآنِ مجید اور رسول اللہ صلی اللہ علیہ وآلہ وسلم کی زبان مبارک سے خبر پہنچی ہے کہ اللہ تعالی نے ایک دار القرار بنایا ہے جسے عرفِ عام میں جنت کہتے ہیں—
جنّت ملے گی کسے...؟؟
جنّت ان لوگوں کو ملے گی جو نیک ہو ںگے اور نیک اعمال کرتے رہیں گے..

اب بتائیے....
کسی شیخی خورے کے علاوہ کس کو نیک ہونے کا دعویٰ ہے...؟؟
کیا کوئی ایسا ہے کہ جو وثوق سے کہہ سکے کہ ہاں میں اپنے اعمال کے بل بوتے پر جنت میں داخل کیا جاؤں گا...؟؟

ازراہِ عجز و انکساری سب لوگ یہی کہیں گے کہ اجی ہم تو بہت گناہگار ہیں— ہمارے اعمال اس لائق نہیں کہ جنت میں جا سکیں...

اب مرزا غالب کا طنز پہچانیے....

فرماتے ہیں کہ ہم میں سے ہر ایک کو جنت کی خبر ہے— ہر ایک جانتا ہے کہ جنّت میں داخلے کا میرٹ کیا ہے... لیکن پھر بھی ہم لاپرواہی سے گناہوں میں مشغول ہیں..
یہ دوہرا معیار ہے... کہ ایک طرف تو ہم جنت کے قصیدے پڑھتے ہیں... اس میں جانے کی دعائیں بھی مانگتے ہیں... لیکن وہ اعمال کرنے کو تیّار نہیں جس سے ہم میرٹ پر آ سکیں—
اس کا سیدھا سادا مطلب یہ ہوا کہ ہمارا ایمان اس درجے کمزور ہے کہ ہمیں جنّت کے ہونے کا یقین ہی نہیں... صرف زبانی کلامی چسکا اور دعاؤں کی ایک سطر کے طور پر رٹے رٹائے انداز میں جنّت مانگ کر بری الذّمہ ہوجاتے ہیں—

یہ انسانی نفسیات پر ایک بہت بڑا طنز ہے...

ہر بندہ جنّت کا شائق ہے.. جنّت میں جانا چاہتا ہے... لیکن وہ اعمال نہیں کرتا جس سے جنّت میں جائے... اور صرف اللّٰہ کی رحمت سے امید لگائی ہوئی ہے—
ہر بندہ جانتا ہے کہ جو پیدا ہوا وہ ایک دن مرتا ہے— مجھے بھی موت آنی ہے— کوئی قبر بھی ہوتی ہے— عالمِ برزخ کے مراحل بھی سامنے ہیں لیکن پھر بھی کم ہی لوگ آخرت کی تیاری میں مصروف ہیں— صاف مطلب ہے کہ اکثریت کا ایمان کمزور ہے—

یہ اس شعر کا ایک پہلو تھ— اب اس شعر کا دوسرا پہلو دیکھیے...

کچھ دیر کیلئے بات سمجھنے کو اگر ہم ایمان کے تین درجے فرض کرلیں تو...
ایک درجہ کمزور ایمان والوں کا
دوسرا درجہ کامل ایمان والوں کا
تیسرا درجہ اکمل ایمان والوں کا

کمزور ایمان والے اکثریت میں ہیں— جنّت کو مانتے ہیں لیکن اس پر یقین رکھ کے وہ اعمال کرنے کو تیّار نہیں اور صرف رحمتِ خداوندی سے امیدوار ہیں—
کامل ایمان والے اللہ سے ڈرتے ہیں— قرآنِ مجید اور رسول اللہ صلی اللہ علیہ وآلہ وسلم کے فرامین پر عمل کرتے ہیں اور ان کا مقصود یہی ہے کہ رحمتِ خداوندی سے جنّت میں داخل ہو کر ابدی زندگی کا سکون پا لیں—
اکمل ایمان والوں کا مقصود جنّت سے بھی آگے ہے— ان کی نظر میں جنّت ایک چھوٹی جزا ہے ان کو اس سے بھی بڑی جزا چاہیے..

غالب فرماتے ہیں...

ستائش گر ہے زاہد اس قدر جس باغِ رضواں کا
وہ اک گلدستہ ہے ہم بیخودوں کا طاقِ نسیاں کا

سنتے ہیں جو بہشت کی تعریف، سب درست
لیکن خدا کرے وہ تری جلوہ گاہ ہو—

کس کی جلوہ گاہ ہو..؟؟ اس سوال کا جواب غالب کے ایک نعتیہ شعر میں دیکھیے...

جُستیم سراغِ چمن خلد بہ مستی
در گرد خرام تو رہ افتاد گماں را
ہم مستی کی حالت میں باغِ جنت کا سراغ لگا رہے تھے کہ ہمارا خیال آپ صلی اللہ علیہ وآلہ وسلم کے مبارک قدموں سے اٹھنے والی گرد کی طرف چلا گیا—

بات واضح ہو گئی— غالب کی نظر میں جنّت رسول اللہ صلی اللہ علیہ وآلہ وسلم مبارک قدموں سے اٹھنے والی گرد ہے— اب غالب کے نقطہ نظر پر غور فرمائیے جس کی نظر محبوب کے قدموں پر ہو وہ اٹھنے والی گرد کو کیا اہمیت دے گا؟

اس تاویل کی سند بھی خاکسار کلامِ غالب اور کلامِ اقبال سے لایا ہے— پہلے غالب کا نعتیہ شعر ملاحظہ ہو...

واعظ حدیثِ سایہ طوبیٰ فروگذار
کاینجا سخن ز سروِ روانِ محمد است
واعظ تو طوبیٰ کے سائے کی بات چھوڑ کیونکہ یہاں حضرت محمد صلی اللہ علیہ وآلہ وسلم کے سروِ رواں(قد مبارک) کی بات ہو رہی ہے...

حضرتِ رابعہ بصری سے ایک واقعہ منسوب ہے کہ ایک ہاتھ میں آگ اور ایک ہاتھ میں پانی لیے جا رہی تھیں— کسی نے پوچھا تو فرمایا جنّت کو آگ لگانے اور جہنم کو بجھانے جا رہی ہوں تا کہ لوگ کسی ڈر اور لالچ کے اس کی عبادت کریں—

اگر اس واقعے میں جنّت کا مذاق نہیں اڑایا گیا تو پھر یہ شعرِ غالب دیکھیے...

طاعت میں تا رہے نہ مے و انگبیں کی لاگ
دوزخ میں ڈال دو کوئی لے کر بہشت کو

جب حیوانِ ظریف اپنی ظرافت کی انتہائی بلندیوں سے جنت کے گریڈی ڈوگز کو دیکھتے ہیں تو تبسّم فرماتے ہیں...

واعظ نہ تم پی سکو نہ کسی کو پلا سکو
کیا بات ہے تمہاری، شرابِ طہور کی...

یہ سب تو ایک حقیر و ناچیز بندے کی نظر سے غالب کا نقطہ نظر دیکھا گیا جو کہ یقیناً بہت سوں کیلئے لاف و گزاف ہوگا لیکن آئیے علامہ اقبال کے الفاظ میں غالب کا نقطہ نظر دکھاؤں...

جاوید نامہ میں اقبال کے الفاظ ہیں...

ارواح ِ جلیلہ حلاج و غالب و قرۃالعین طاہرہ کہ بہ نشیمنِ بہشتی نہ گردیدند و بگردشِ جاوداں گرائیدند

★ترجمہ؛
حلاج، غالب اور قرۃ العین طاہرہ کی عظیم روحیں جو کہ اپنے بہشتی نشیمن کی طرف مائل نہ ہوئیں اور سیرِ جاوداں میں مشغول رہیں—
(اقبال نے غالب کی روح کو ارواحِ جلیلہ میں سے ایک قرار دیا ہے اور اس لفظ کا ترجمہ خاکسار نے عظیم روحیں کیا ہے— اگر کسی ظاہر پرست کو اب بھی غالب کے مقام و مرتبے میں شک و شبہ رہ گیا ہو تو وہ صاحبِ علم میری غلطی درست کر دے—)

جاوید نامہ کے مطابق جب علّامہ اقبال کی ان عظیم ارواح سے ملاقات ہوئی تو اقبال نے پہلا سوال یہی پوچھا کہ......

از مقامِ مومناں دوری چرا؟
یعنی از فردوس مہجوری چرا؟
مومنوں کے مقام سے دور رہنا کیوں
یعنی فردوس سے باہر رہنا کیوں؟

ان عظیم ارواح کا جواب اقبال کے الفاظ میں...

ایک آزاد مرد جو اچھّے اور برے کو خوب پہچانتا ہے— اس کی روح بہشت کے اندر نہیں سما سکتی—
ملا کی جنت تو شراب، حور و غلمان والی جنت ہے— لیکن آزاد لوگوں کی جنت سیرِ جاوداں ہے—

ملا کی جنّت میں کھانا پینا، سونا اور موسیقی سننا ہے اور ایک عاشق کی جنّت وجود یعنی محبوبِ حقیقی کے دیدار کی خواہش ہے—
ملا کا حشر قبر کھلنے اور بانگِ صور پر مردوں کے اٹھنے کا نام ہے جبکہ ہنگامہ برپا کرنے والا عشق خود قیامت کی صبح ہے—

یہ اشعار ابھی اور بھی ہیں لیکن سند کیلئے اتنے اشعار کا ترجمہ ہی کافی ہے اور جن کی آنکھیں اب بھی بغضِ غالب کی نیند سے نہ کھلیں تو ایسوں کو سات سلام ہیں—

...

غزل

رستہ بھی کٹھن دھوپ میں شدت بھی بہت تھی
سائے سے مگر اس کو محبت بھی بہت تھی

خیمے نہ کوئی میرے مسافر کے جلائے
زخمی تھا بہت پاؤں مسافت بھی بہت تھی

سب دوست میرے منتظرِ پردہء شب تھے
دن میں تو سفر کرنے میں دِقت بھی بہت تھی

بارش کی دعاؤں میں نمی آنکھ کی مل جائے
جذبے کی کبھی اتنی رفاقت بھی بہت تھی

کچھ تو ترے موسم ہی مجھے راس کم آئے
اور کچھ مری مٹی میں بغاوت بھی بہت تھی

پھولوں کا بکھرنا تومقدر ہی تھا لیکن
کچھ اس میں ہواؤں کی سیاست بھی بہت تھی

وہ بھی سرِ مقتل ہے کہ سر جس کا تھا شاہد
اور واقفِ احوال عدالت بھی بہت تھی

اس ترکِ رفاقت پہ پریشاں تو ہوں لیکن
اب تک کے ترے ساتھ پہ حیرت بھی بہت تھی

خوش آئے تجھے شہرِ منافق کی امیری
ہم لوگوں کو سچ کہنے کی عادت بھی بہت تھی

پروین شاکر

مرزا محمد ھادی رسوا

مرزا محمد ھادی رسوا ۔۔۔۔۔۔۔۔۔۔
آج 21 ، اکتوبر معروف ناول نگار اور ادیب مرزا ھادی رسوا کا یومِ وفات ھے ۔
سال پیدائش : 1857ء
تاریخ وفات : 21، اکتوبر 1931ء
مرزا محمد ہادی رسوا (1857ء تا 21 اکتوبر، 1931ء) ایک اردو شاعر اور فکشن کے مصنف (بنیادی طور پر مذہب، فلسفہ، اور فلکیات کے موضوعات پر) گرفت رکھتے تھےانہیں اردو، فارسی، عربی، عبرانی، انگریزی، لاطینی، اور یونانی زبان میں مہارت تھی۔ ان کا مشہور زمانہ ناول امراؤ جان ادا 1905ء میں شائع ہوا جو ان کا سب سے پہلا ناول مانا جاتا ہے۔ یہ ناول لکھنؤ کی ایک معروف طوائف اور شاعرہ امراؤ جان ادا کی زندگی کے گرد گھومتا ہے بعد ازاں ایک پاکستانی فلم امراؤ جان ادا (1972)، اور دو بھارتی فلموں، امراو جان (1981) اور امراو جان (2006) کے لئے بنیاد بنا۔ 2003ء میں نشر کئے جانے والے ایک پاکستانی ٹی وی سیریل کی بھی بنیاد یہی ناول تھا۔
مرزا محمد ہادی رسوا کی زندگی کی درست تفصیلات دستیاب نہیں ہیں اور ان کے ہم عصروں کی طرف سے دی گئی معلومات میں تضادات موجود ہیں البتہ رسوا نے خود تذکرہ کیا ہے کہ ان کے آباء و جداد فارس سے ہندوستان میں آئے اور ان کے پردادا سلطنت اودھ کے نواب کی فوج میں ایک ایڈجوٹنٹ تھے۔ جس گلی میں رسوا کا گھر تھا اسے ایڈجوٹنٹ کی گلی کے طور پر جانا جاتا ہے۔ انہوں نے اپنے والد اور دادا کے بارے میں اس سے زیادہ کچھ نہیں بتایا کہ وہ دونوں ریاضی اور فلکیات میں خاصی دلچسپی رکھتے تھے۔ مرزا محمد ہادی رسوا 1857ء کو، ایک گھڑسوار، فوجی افسر، مرزا محمد تقی کے گھر لکھنؤ، اتر پردیش میں پیدا ہوئے۔انہوں نے گھر میں ابتدائی تعلیم حاصل کی۔ وہ سولہ سال کے تھے جب ان کے والدین دنیا سے کوچ کر گئے۔ نوجوانی میں وفات پانے والےان کے بڑے بھائی مرزا محمد ذکی، ایک علمی شخصیت تھے۔ اس دور کے ایک مشہور خطاط حیدر بخش نے رُسوا صاحب کو خوش خطی سکھائی اور انہیں کام کرنے کے لئے کچھ رقم ادھار بھی لیکن حیدر بخش کی آمدنی ڈاک کی جعلی ٹکٹ سازی سے آتی تھی لہٰذا اُسے گرفتار کر لیا گیا اور ایک طویل مدت کے لئے قید کی سزا سنائی گئی۔رُسوا کے لکھنے کے کیریئر میں اُن کی مدد کرنے والے بہت سے لوگوں میں سے ایک اردو شاعر، دبیر بھی تھے۔ رسوا نے گھر میں تعلیم حاصل کی اور میٹرک پاس کیا، اس کے بعد انہوں نے منشی فاضل کے کورس کا امتحان دیا اور منشی فاضل ہوگئے۔؎کوئٹہ بلوچستان میں ریلوے میں ملازمت کی۔ دوران ملازمت کیمیا کا ایک رسالہ ہاتھ لگ گیا جس کے مطالعے کے بعد کیمیا گری کی طرف مائل ہو گئے۔ کہا جاتا ہے کہ مرزا رسوا نے پچاس سے زیادہ تصنیفات یاد گار چھوڑیں تاہم اردو ادب میں ان کا نام ناول نگار کی حیثیت سے ہمیشہ زندہ رہے گا۔

اردو غزل

دبی دبی سی وہ مسکراہٹ لبوں پہ اپنے سجا سجا کے
وہ نرم لہجے میں بات کرنا ادا سے نظریں جھکا جھکا کے
وہ آنکھ تیری شرارتی سی وہ زلف ماتھے پہ ناچتی سی
نظر ہٹے نہ ایک پل بھی، میں تھک گیا ہوں ہٹا ہٹا کے
وہ تیرا ہاتھوں کی اُنگلیوں کو ملا کے زلفوں میں کھو سا جانا
حیا کو چہرے پہ پھر سجانا، پھول سا چہرہ کھلا کھلا کے
وہ ہاتھ حوروں کے گھر ہوں جیسے، وہ پاؤں پریوں کے پر ہوں جیسے
نہیں تیری مثال جاناں، میں تھک گیا ہوں بتا بتا کے۔۔

ٹام الٹر ۔۔۔۔ آپ یاد آؤ گے

ٹام الٹر الوداع ........"

ٹام الٹر، نیلی انکھون والا ہندوستانی گورا جو ایک غضب کا اداکار تھا، اب ہمارے درمیان نہیں رہا۔
ٹام الٹر کا جنم 22 جون 1950 میں میسوری اتر کنڈ انڈیا میں ایک پادری کے گھر ہوا۔ انکے دادا، دادی عیسائیت کی تبلیغ کیا کرتے تھے اور اس سلسلے میں وہ امریکی ریاست اوہائیو سے نومبر 1916 کو بحری جہاز میں چنائی اگئے اور وہاں سے بذریعہ ٹرین لاہور چلے گئے۔ اس دوران انکے دادا دادی راولپنڈی پشاور اور سیالکوٹ میں عیسائیت کی تبلیغ کرتے رہے۔ ٹام الٹر کے والد کا جنم سیالکوٹ میں ہوا تھا، تقسیم ہند کے بعد انکے والد انڈیا اگئے جہاں وہ آلہ اباد کے ایک کریسچن کالج میں پڑھایا کرتے تھے۔ انہیں فلسفہ تاریخ اور مزہب سے سے بڑا لگاؤ تھا۔ ٹام الٹر کے دادا دادی نے پاکستان میں ہی رہنا پسند کیا۔ ٹام الٹر کا بچپن میسوری الہ آباد سہارن پور اور راج پور میں گزرا۔ ٹام الٹر نے ابتدائی تعلیم ووڈ سٹاک سکول میسوری سے حاصل کی، میٹرک کے بعد اٹھارہ سال کی عمر میں والد نے انہیں کالج پڑھنے کیلئے امریکا بھیجا لیکن وہاں مشکل پڑھائی کیوجہ سے انکا دل پڑھنے میں نہیں لگا وہ زیادہ دیر تک اوارہ گردی کرتے رہے اور پھر ایک سال بعد واپس انڈیا اگئے۔ انکے پادری والد نے انہیں فارغ رہنے نہیں دیا اور انہیں جگادری ہریانہ کے سینٹ ٹھامس سکول میں بھرتی کروایا جہاں انہوں نے چھ مہینے کرکٹ کوچنگ کی۔ ٹام الٹر کی زندگی میں ٹرنینگ پوائنٹ ہریانہ جگادری میں ہی آیا، شروع میں ٹام الٹر کا رجحان کھیلوں کی طر ف تھا، لیکن جگادری ہریانہ میں انہوں نے ایک دن راجیش کھنہ کی فلم ارادھنا دیکھی اور وہ اس فلم سے اس قدر متاثر ہوئے کہ انہوں نے من بنا لیا کہ اب وہ فلموں میں کام کرینگے۔ لیکن اسوقت سیدھا منہ اٹھا کر فلموں میں جو جلا جاتا تھا اسے منہ کی کھانی پڑتی تھی اس لئے ٹام الٹر نے اداکاری سیکھنے کیلئے پونا کا رخ کیا اور وہاں انہوں نے پونا فلم انسٹیٹیوٹ میں داخلہ لیا جہاں پر اوم پوری شبانہ اعظمی نصیرالدین شاہ اور بنجمن ایرانی بھی ایکٹینگ سیکھ رہے تھے۔ پونا میں ٹام الٹر کی نصیر الدین شاہ سے بہت گہری دوستی بنی وہ اپنے کرکٹ ٹیم کے کپتان بھی بنے اور نصیر الدین شاہ انکے ساتھ ٹیم میں شامل تھے۔ پونا میں ٹام الٹر نے 1972 سے لیکر 1974 تک دو سالوں میں اپنے گرو روشن تنیجا سے اداکاری سیکھی۔ اسکے بعد وہ ممبئی اگئے جہاں انہیں پہلا چانس رمانند ساگر کی فلم چرس میں ملا جس میں اسوقت کی مشہور جوڑی دھرمیندر اور ہیما مالینی نے کام کیا تھا یہ فلم 1976 میں ریلیز ہوئی۔ شروعات میں انہیں گورے رنگ کی وجہ سے انگریز افسر کا کردار ملا کرتا تھا جس میں عموماً وہ غنڈہ گردی کرتے نظر آیا کرتے تھے۔ بعد میں انہیں ہندی کردار بھی ملنے لگے۔ ٹام الٹر نے مشہور زمانہ بنگالی فلمساز ستیہ جیت رے کی ہندی فلم ’شطرنج کے کھلاڑی' میں کام کیا جسے بہت سراہا گیا بعد میں انہوں نے رچرڈ اینٹنبرو کی فلم گاندھی اور راج کپور کی فلم ’رام تیری گنگا میلی‘ جیسی کامیاب فلموں میں غضب اداکاری کی۔ منوج کمار محب وطنی پر بنی فلموں کیوجہ سے مشہور مانے جاتے ہیں اس لئے جب منوج کمار نے فلم ’کرانتی‘ بنانا شروع کی تو انہوں نے انگریز افسر کے کردار کیلئے ٹام الٹر کو چنا اور اس کردار میں ٹام الٹر نے شاندار اداکاری کی، اس فلم کے انکی منوج کمار سے بڑی اچھی دوستی بنی۔
ٹام الٹر نے جب ارادھنا فلم دیکھی تھی تب انہوں نے سوچا بھی نہیں تھا کہ وہ اپنے محبوب اداکار روجیش کھنہ کے ساتھ ایک دن کام کرینگے لیکن سچی لگن سے انہوں نے یہ خواب سچ کرکے دکھایا انہوں راجیش کھنہ کے ساتھ دو فلموں میں کام کیا۔ ہری کیش مکھرجی کی فلم نوکری اور 1993 میں بنی فلم سردار میں انہوں نے راجیش کھنہ کے ساتھ کام کیا فلم سرادر مشہور نیتا سردار پٹیل کی زندگی پر بنی تھی۔
ہندی کے علاوہ انہوں نے انگریزی فلم ’وِتھ لَو، دلّی‘، ’سن آف فلاور‘، ’سائیکل کِک‘، ’اَوتار‘، ’اوسیان آف اَن اولڈ مین‘، ’وَن نائٹ وتھ دی کنگ‘، ’سائلنس پلیز‘ جیسی فلموں میں اہم کردار ادا کیے۔
ٹام نے تقریباً 300 فلموں میں کام کیا۔
فلموں کے علاوہ انھوں نے اپنے کیریر کا ایک بڑا وقت تھیٹر کو دیا۔ ٹام الٹر نے 1977 میں اپنے دوست نصیر الدین شاہ اور بنجمن ایرانی کے ساتھ موٹلی کے نام سے ایک تھیٹر گروپ بنایا۔ ٹام الٹر مولانا عبدالکلام آزاد سے بہت متاثر تھے۔ انہوں نے 2014 میں راجیہ سبھا ٹی وی کے پروگرام ’سنویدھان‘ میں مولانا ابوالکلام آزاد کا کردار نبھایا جس میں ان کے کردار کی بہت تعریف ہوئی۔ ٹام الٹر نے ٹیلی وژن پر بھی کام کیا اور لوگوں کی دل میں ایک خاص مقام بنایا۔ اسی سال ان کی فلم ’سرگوشیاں‘ ریلیز ہوئی ہے جس میں انھوں نے مرزا غالب کا کردار نبھایا۔ تھیٹر میں ٹام الٹر نے کئی سالوں تک مولا عبدالکلام آزاد پلے کیا۔ اسکے علاوہ انہوں نے مولانا ظفر علی خان، گاندھی، ساحر لدھیانوی، غالب اور ٹیگور کا کردار ادا کیا۔ ٹام الٹر کو اردو زبان سے جنون کی حد تک عشق تھا۔ صاف اردو کیوجہ سے ٹام الٹر سٹیج پر اتنی جاندار اداکاری کرتے تھے کہ کسی کا دھیان ان کے گورے چہرے پر نہیں جاتا تھا،
ٹام الٹر کو فلموں کے علاوہ کھیل میں بھی کافی دلچسپی تھی۔ ٹام سچن تندولکر کا انٹرویو لینے والے پہلے شخص تھے۔ 1988 میں جب ماسٹر بلاسٹر سچن 15 سال کے تھے، تب ٹام نے ان کا پہلا انٹرویو لیا تھا۔
ٹام کو جلد کا کینسر تھا۔ وہ طویل مدت سے بیمار تھے۔ ان کا ممبئی کے سیف اسپتال میں علاج چل رہا تھا جہاں اکثر وہ تنہا ہی ہوتے تھے۔ اپنی اسی روداد کو ٹام نے ریختہ کو دیے انٹرویو میں غالب کے شعر کے بہانے شاید یوں بیان کیا تھا۔

"پڑیے اگر بیم.ار، تو کوئی نہ ہو تیماردار

اور مر جائیے اگر، تو نوحہ خواں کوئی نہ ہو...

یوم اساتذہ مبارک

          

    کتنی محبتوں سے پہلا سبق پڑھایا،
   میں کچھ نہ جانتا تھا، سب کچھ مجھے سیکھایا،
   انپڑھ تھا اور جاہل، قابل مجھے بنایا،
   دنیائے علم و دانش کا راستہ دکھایا،
   مجھ کو دلایا کتنا اچھا مقام کہنا،
    استاد محترم سے میرا سلام کہنا.....
         

اسلام علیکم ،
                  
           اراکین بزم جو بطور اساتذہ، والدین، خواہر و برادر بزرگ، نسل نو کی تعلیم و تربیت  میں اپنا کردار ادا کر رہے ہیں، میں ان کے جوش، جذبے، دلچسپی، محنت، لگن، عاجزی، انکساری، ایثار و قربانی اور جہد مسلسل کو سلام محبت پیش کرتا ہوں اور ان کی کامیابی کے لئیے دعا گو ہوں.......
             رب کریم انہیں اجر عظیم عطا فرمائے، آمین.

       استطاعت کے مطابق تو کیا جگ روشن،
      ہم وہ جگنو ہیں جو تنویر سے بھی بچتے رہے."

یومِ اساتذہ مبارک

مبئی کی مشہور ومعروف سوشل ورکر صابرہ سکوانی کاانتقال

ممبئی کی مشہور ومعروف سوشل ورکر صابرہ سکوانی کاآج صبح سویرے ان کی رہائش گاہ نزد جے جے اسپتال انتقال ہوگیا۔ 49سالہ صابرہ سکوانی غریب ویتیم لڑکیوں  کی شادی کراتی تھیں اور یتیم بچوں  کو تہوار کے موقع پرتفریح  کرانے ان کی دعوتیں کرتیں انھیں پیارکرتی تھیں۔شوہر اسلم سکوانی، بیٹا رضوان اور ایک بیٹی ہے۔وہ سماجی کاموں کے ساتھ ساتھ سیاسی سرگرمیوں میں بھی مصروف تھیں اور این سی پی کی ورکر تھیں۔ ذرائع  کے مطابق مرحومہ سکوانی کا جنازہ رات نماز عشاء پر اٹھایاجائیگاباور پرنسس بلڈنگ جے جے جنکشن کے عقب میں بی آئی ٹی چال سڈنہم کمپاونڈ  میں نماز جنازہ ہوگی اور بڑے قبرستان کے پاس منگل واڑی میں واقع کچھی میمن جماعت قبرستان میں تدفین عمل میں آئے گی، صابرہ سکوانی کے انتقال کے سبب علاقے میں صدمہ کی لہر صابرہ سکوانی بہت ملنسار اور خوش مزاج تھی۔ہر وقت سب کی مدد کے لیے تیار رہتی تھی۔لن ترانی کی ٹیم دعاگو ہیں اللہ ان کی مغفرت کریں۔اور جنت الفردوس میں جگہ عطا فرمائیں

غزل

بے زبانی کا تقاضا ہے کہ ہم چُپ ہی رہیں
اِس کہانی کا تقاضا ہے کہ ہم چُپ ہی رہیں

درد ایسا ہے کہ پتھّر کا کلیجہ پھٹ جائے
سخت جانی کا تقاضا ہے کہ ہم چُپ ہی رہیں

میہماں بن کے ستم گر نے ستم ڈھایا ہے
میزبانی کا تقاضا ہے کہ ہم چُپ ہی رہیں

کس نے بخشے ہیں اِن آنکھوں کو اُبلتے آنسو
حق بیانی کا تقاضا ہے کہ ہم چُپ ہی رہیں

تنگ ظرفی کی علامت ہے جتانا احساں
مہربانی کا تقاضا ہے کہ ہم چُپ ہی رہیں

ٹوٹ جائے نہ بھرم پیار کا اِک دن راغبؔ
خوش گمانی کا تقاضا ہے کہ ہم چُپ ہی رہیں

شاعر: افتخار راغبؔ
کتاب: لفظوں میں احساس

مجھے خط ملا

مجھے خط ملا ہے غنیم کا
بڑی عُجلتوں میں، لکھا ہُوا

کہیں،، رنجشوں کی کہانیاں
کہیں دھمکیوں کا ہے سلسلہ

مجھے کہہ دیا ہے امیر نے
کرو،،،، حُسنِ یار کا تذکرہ

تمہیں کیا پڑی ہے کہ رات دن
کہو،،،،،، حاکموں کو بُرا بھلا

تمہیں،،، فکرِ عمرِ عزیز ہے
تو نہ حاکموں کو خفا کرو

جو امیرِ شہر کہے تُمہیں
وہی شاعری میں کہا کرو

کوئی واردات کہ دن کی ہو
کوئی سانحہ کسی رات ہو

نہ امیرِ شہر کا زکر ہو
نہ غنیمِ وقت کی بات ہو

کہیں تار تار ہوں،، عصمتیں
میرے دوستوں کو نہ دوش دو

جو کہیں ہو ڈاکہ زنی اگر
تو نہ کوتوال کا،،،،، نام لو

کسی تاک میں ہیں لگے ہُوئے
میرے جاں نثار،،،،، گلی گلی

ہیں میرے اشارے کے مُنتظر
میرے عسکری میرے لشکری

جو تُمہارے جیسے جوان تھے
کبھی،،، میرے آگے رُکے نہیں

انہیں اس جہاں سے اُٹھا دِیا
وہ جو میرے آگے جُھکے نہیں

جنہیں،، مال و جان عزیز تھے
وہ تو میرے ڈر سے پِگھل گئے

جو تمہاری طرح اُٹھے بھی تو
اُنہیں بم کے شعلے نگل گئے

میرے جاں نثاروں کو حُکم ہے
کہ،،،،،، گلی گلی یہ پیام دیں

جو امیرِ شہر کا حُکم ہے
بِنا اعتراض،، وہ مان لیں

جو میرے مفاد کے حق میں ہیں
وہی،،،،،،، عدلیہ میں رہا کریں

مجھے جو بھی دل سے قبول ہوں
سبھی فیصلے،،،،،،، وہ ہُوا کریں

جنہیں مجھ کچھ نہیں واسطہ
انہیں،،،، اپنے حال پہ چھوڑ دو

وہ جو سرکشی کے ہوں مرتکب
انہیں،،،،، گردنوں سے مروڑ دو

وہ جو بے ضمیر ہیں شہر میں
اُنہیں،،،، زر کا سکہ اُچھال دو

جنہیں،،،،، اپنے درش عزیز ہوں
اُنہیں کال کوٹھڑی میں ڈال دو

جو میرا خطیب کہے تمہیں
وہی اصل ہے، اسے مان لو

جو میرا امام،،،،،،، بیاں کرے
وہی دین ہے ، سبھی جان لو

جو غریب ہیں میرے شہر میں
انہیں بُھوک پیاس کی مار دو

کوئی اپنا حق جو طلب کرے
تو اسے،، زمین میں اتار دو

جو میرے حبیب و رفیق ہیں
انہیں، خُوب مال و منال دو

جو، میرے خلاف ہیں بولتے
انہیں، نوکری سےنکال دو

جو ہیں بے خطاء وہی در بدر
یہ عجیب طرزِ نصاب ہے

جو گُناہ کریں وہی معتبر
یہ عجیب روزِ حساب ہے

یہ عجیب رُت ہے بہار کی
کہ،، ہر ایک زیرِ عتاب ہے

"کہیں پر شکستہ ہے فاختہ
کہیں،،، زخم زخم گلاب ہے"

میرے دشمنوں کو، جواب ہے
نہیں غاصبوں پہ شفیق میں

میرے حاکموں کو خبر کرو
نہیں،، آمروں کا رفیق میں

مجھے زندگی کی ہوس نہیں
مجھے،، خوفِ مرگ نہیں زرا

میرا حرف حرف لہو لہو
میرا،،، لفظ لفظ ہے آبلہ
                            Faiz Ahmed Faiz